Manipur tribal zirlai pawlin ADC inthlan hun puan phut

Manipur-a tribal zirlai pawl, All Tribal Students’ Union, Manipur (ATSUM) chuan Nilaini khan state sorkar chu hill district-a autonomous district council (ADC) paruk-a inthlan neih hun puang turin an phut. 

ATSUM chuan inthlan hun puanna atan sorkar chu ni li hun an pe tih sawiin, a puang lo a nih chuan October 26 hian state pumah bandh huaihawt an tum tih an sawi. 

Manipui-ah hian hill district 10 a awm a, heng zinga panga chu siam thar an ni. Hill district zawng zawng hi ADC paruk - Churachandpur, Chandel, Ukhrul, Senapati, Tamenglong leh Sadar Hills huam chhungah an awm. ADC term hi may thla khan a zo tawh a, mahse hri leng avangin state sorkar chuan thla ruk pawtseiin, October-November chhunga inthlan neih turin a ti a ni. Mahse inthlan buatsaih tum hian sorkar chuan hma a la zui lo tih ATSUM chuan an sawi a ni. 

October 25 thleng state sorkarin inthlan neih hun tur a puang lo a nih chuan, ATSUM chuan a tuk, October 26 aṭangin ni hnih chhung inter-state bandh huaihawt an tum tih an tarlang. Hill district hrang hranga national project thawh mekte pawh tihtawp vek an nih tur thu an sawi bawk.