Manipur : Sorkarin IDP chhawmdawlna sem

Manipur sorkar chuan an state-a tualchhung buaina chhuak vanga himna zawnga state chhung hmun danga tlanchhia, internally displaced person (IDP) te hnenah chhawmdawlna a sem.

State sorkar chuan IDP chhawmdawlna tur hian Rs vbc 5 a lo ruahman tawh a, hemi aṭang hian IDP tinte hian Rs 1,000 ṭheuh bakah, nitin khawsakna atana an mamawh dangte an dawng a ni. Chief minister N Biren Singh chuan chhawmdawlna pek tur Diwali and ‘Ningol Chakouba’ festival-ahte a sem a ni.

Tualchhung buaina chhuak tuartu, himna zawnga an in leh lo tlanchhiatsan mi tam takte chu sorkarin relief camp a siamah an la khawsa mek. Buaina a chhuah ṭan hun, kum 2023 May thla aṭang khan state chhung hmun danga tlanchhiat hi mi 45,000 chuang an tling. Sorkar chuan chhawmdawlnate pawh pe ṭhin mah se an mamawh a phuhru zo lo hle. Thlasik lo thleng tur nen, camp-a awmte chuan blanket leh mattress te an mamawh hle tih sawiin, thuneitute pawh an lo ngen tawh a ni.

Navi Mumbai-ah naupang chhanchhuak

Sub-Divisional Police Officer Yairipok kaihhruai Manipur Police team te leh Mumbai Police ṭangkawp chuan Navi Mumbai-a Jasai-ah hmeichhe naupang bo an chhanchhuak.

He hmeichhe naupang hi October 24 aṭang khan chin hriat lohin a awm a ni. Assam mi pakhat, Abdul Mannaf Choudhury chuan Manipur mi nia inchhalin nupuia neih tiamin a ru bo nia sawi a ni. Hmeichhe naupang pa hian complaint a thehluh hnuah Manipur police-te hian a zawn hna hi a thawk a ni.

Police-te hian hmeichhe naupang mobile phone signal hi chhuiin, Navi Mumbai hi an chhui thleng a ni. Mumbai police-te puihnain a ru botu hi an man thei ta a ni. Nimin khan Choudhury hi Mumbai court-ah hruai niin, hemi hnu hian Manipur police-te chuan Imphal-ah hruai chhoin, thubuai siamsak a ni ang.