Rajya Sabha-in LBA kalpuina tur bill a pass Assam-ah AGP-in a dodal nan bandh huaihawt

India leh Bangladesh-in ram inchuh thubuai chinfelna tur leh an inluahsakte inthleng tawnna atana Land Boundary Agreement (LBA) an ziah a taka kalpuina tur, Constitution 119th Amendment Bill, 2013 chu Nilaini khan Rajya Sabha-in a pass.

Rajya Sabha-a member 180-in bill hi an thlawp a, a dodaltu an awm loh bakah rorel lai leh eptute'n lungrual taka dar kar thum chhung leka bill an pass thei chu ni chhinchhiahtlak tak a ni, an ti. Bill hi Lok Sabha-a putluh leh tur a ni.

External Affairs Minister Sushma Swaraj chuan LBA kalpuina atan hma lo la hmasatu leh constitution amendment bill lo buatsaih tawhtu, UPA sorkar chu fakawm a tih thu a sawi a, LBA kalpui a nih hunah India mi, Bangladesh ram luahtute chu India rama an kir duh chuan chhawmdawlna tur ngaihtuahsak vek an nih tur thu a sawi.

Swaraj chuan bill chu Assam-in a dodal avang leh Assam Chief Minister Tarun Gogoi-a'n LBA chungchangah a lungawi loh thu a sawi avangin Assam chu teltir loh an rel hman thu a sawi a, Union cabinet pawhin Assam telh loh chu a pawm hman thu a sawi bawk. Mahse External Affairs Minister chuan Rajya Sabha eptu hruaitu, Ghulam Nabi Azad, Anand Sharma leh Standing Committee chairman Shashi Tharoor te a biak hnuah Bangaladesh nena thuthlung an lo ziah tawh anga kaltlangpui an duh tih a sawi a, Assam Chief Minister Gogoi pawhin Assam telh turin Prime Minister Narendra Modi hnenah lehkhathawna a ngen leh thu a sawi.

LBA kalpuina tur, Constitution Amendment Bill sawihonaah hian MP 21 an tel a, Assam MP Bhubaneswar Kalita chuan Assam mipuite'n an dodal avangin LBA chu ngaihtuah ṭhat theih a ni em tiin zawhna a zawt a, mahse Swaraj chuan ngaihtuah ṭhat theih a nih loh thu a sawi.

Nilainia LBA kalpuina tur bill pass a nih ṭum hian kum 2011-a LBA 1974 hnuaia Bangladesh nena inremna thuthlung ziaktu, Prime Minister hlui, Manmohan Singh pawh a tel a, External Affairs Minister Swaraj chuan PM hlui Singh chu fakin, "Hna thawk ṭantu a ni a, a thawk zotu mai kan ni," a ti.

Swaraj chuan India leh Bangladesh-in ram an inluahsakte an inthleng chuan Bangladesh lama India mi chengte India ram an rawn pemluh a ngai dawn tih a sawi a, lo lut turte hi mi eng zat chiah nge an nih an hriatchian loh thu leh mi 3,500 aṭanga 35,000 thleng an nih a rin thu a sawi.

Hetihlai hian Assam-a tualṭo party, Asom Gana Parishad (AGP) chuan LBA kalpuina tur bill Rajya Sabha-in a pass dodal nan nimin khan darkar 10 awh bandh an huaihawt.

AGP general secretary pahnih- Durga Das Bodo leh Kamalakanta Kalita chuan thuchhuah an siamah LBA dodal zel an tum thu an tarlang a, BJP leh Congress chu Assam mipuite duhdan zahsak loah an puh bawk.