TTAADC inthlanah Left party-in hnehna chang

Member 30 awmna Tripura Tribal Areas Autonomous District Council (TTAADC) inthlan chu May 3 khan neih a ni a, Nilainia inthlan result puanah CPI-M kaihhruai, Left front chuan seat 28 lain hnehna an chang.

CPI-M chuan party malin seat 25 a la a, a thawhpui Com­munist Party of India (CPI), Revolutionary Socialist Party (RSP) leh Forward Bloc (FB) te'n seat ṭheuh an la.

Member 30 zinga member 28 hi mipuite'n an thlang a, seat hnih hi nominate seat niin, seat 27 chu tribal te tan hauh a ni.

Vote tla zawng zawng aṭangin Left Front hian 54% vote an hmu a, mahse hei hi TTAADC inthlan neih hmasak ṭuma vote an hmuh aiin 11%-in a tlem. Kum 2010 inthlanah Left Front chuan vote 65% hmuin seat 28-ah hnehna a lo chang tawh bawk.

Indigenous People’s Front of Tripura (IPFT) chu seat 17-ah a pahnihna dinhmun a hauh a, BJP-in seat 4-ah pahnihna dinhmun a hauh bawk. Congress party chu seat hnih-ah pahnihna dinhmun a hauh a, seat tam zawkah a pathumna leh palina dinhmun a hauh.

May 3-a TTAADC seat 28-a inthlanna neihah candidate 175 an awm a, heng zinga 10 hi hmeichhia niin, CPI-M candidate hmeichhe pathumin hnehna an chang.