AP district zawng zawngah AFSPA lekkawh vek a ni lo : Rijiju

Union Minister of State for Home Affairs Kiren Rijiju chuan Arunachal Pradesh district zawng zawngah Armed Forces Special Powers Act (AFSPA) lekkawh vek a nih loh thu a sawi.

"Hmarchhak biala helpawlte- NDFB(S), ULFA(I) leh NSCN(K) te pawikhawihna ven nan Arunachal Pradesh district ṭhenkhat, Assam ramria awmte chu Armed Forces (Special Powers) Act, 1958 tlawhchhanin hun rei lote chhung atan disturbed area-a puan a ni," a ti.

"Tunah hian Tirap, Changlang leh Longding district-ah AFSPA chu thla ruk chhung pawhsei a ni a, a bak zawng chu Assam ramria district ṭhenkhat, police station 16 huam chhungah chauh lekkawh a ni tawh," tiin Rijiju chuan Rajya Sabha inkhawmah a sawi.

Hetihlai hian All Arunachal Pradesh Students Union (AAPSU) chuan AFSPA chu Union Minister Rijiju-a'n an hnuhkir tawh thu a tarlang.

AAPSU palaite chuan tun hnai khan New Delhi-ah Union Minister Rijiju hi an hmuh thu leh, sorkar laipuiin AFSPA tlawhchhana disturbed area huam chhung a tihzau chu a sut tawh thu a lo hrilh tih an tarlang.