LBA kalpuina tur bill Lok Sabha-in a pass

Land Boundary Agreement (LBA) kalpuina tur, 119th Constitution Amendment Bill chu Nilainia Rajya Sabha-in a pass hnuah Ningani khan Lok Sabha-in a pass ve leh.

Constitution Amendment Bill hi Lok Sabha-a member 322-in an thlawp a, a thlawp lo lamah vote tla awm loin, lung­rual taka pass a ni. A dodaltu awmchhun, All India United Democratic Front (AIUDF) MP leh Assam, Karimganj bialtu Radhay Shyam Biswas pawhin a thlawp lamah vote a thlak a, hetihlai hian AIUDF MP pahnih- Badruddin Ajmal leh Sirajuddin Ajmal te chu vote thlak laiin an awm lo.

Bill puluttu, External Affairs Minister Sushma Swaraj chuan Nilainia Rajya Sabha-a bill a putluh ṭuma a thusawite Lok Sabha-ah hian a sawi leh a, LBA chanchin tlangpuite leh Assam chu LBA aṭanga paih a nih hnua telh a nih leh thu a sawi.

Swaraj chuan LBA kal­pui­na tur bill chu kum 2013-a UPA sorkarin a buatsaih laiin Asom Gana Parishad (AGP), BJP leh Trinamool Congress te'n an thlawp loh thu a tarlang a, tuna lungrual taka an pawm thei chu lawmawm a tih thu a sawi bawk.

External Affairs Minister chuan LBA chu a kalpui a nih chuan India leh Bangladesh ram inchuh aṭangin Assam-in acre 470 a chan theih tur thu a sawi a, a vaiin India-in acre 1,024-a zau a chan tur thu a sawi. Bangladesh ramri hung hna thawh mek chu 88% thawh zawh tawh a nih thu leh ramri chhinchhiahna peihfel a nih hunah hung zawh theih an beisei thu a sawi bawk.

Swaraj chuan LBA kal­pui­na atan West Bengal chu cheng vaibelchhe 3,008 pek a nih tur thu a sawi.

Bill sawihonaah hian Assam BJP MP Rajen Gohain chuan Assam chu Bangladesh mite chenna hmun a nih tawh thu sawiin, Bangladesh ram inchuh Assam-in a chan tur chu dan phal loha Assam-a pem tumte tan hmun remchang a nih a hlauhthawn thu a sawi.

Gohain chuan LBA kalpuina tur Constitution Amendment Bill-in Assam venhimna a ngai pawimawh a nih chuan bill chu a dodal loh thu a sawi a, "Kan ram chu a him tur a ni," a ti.

India leh Bangladesh chuan LBA hi ram inchuh thubuai chinfelna atan leh ram an inluahsakte inthleng hlenna turin kum 1974, May 16 khan an ziak a, kum 2011 khan UPA sorkara Prime Minister Manmohan Singh leh Bangladesh Prime Minister Sheikh Hasina chuan LBA 1974 hnuaiah hian ram inluahsakte inthlengna atan inremna thuthlung an siambelh leh a, he inremna thuthlung hi central-a NDA sorkar chuan a taka kalpui tumin Constitution Amendment Bill hi Parliament in hnihah putluh a ni a, lungrual taka pass a ni.