Nido Tania case: HC in rinhlelh palite hriattirna a pe

Kum 2014, January 29-a Delhi, Lajpat Nagar-a Arunachal Pradesh zirlai Nido Tania-a sawisa hlumtua rinhlelh palite chu Ninga­ni khan Delhi High Court chuan SC/ST Act tlawhchhana thubuai siam­sak lo tura an ngennaah insawifiah turin a hriattir.

Justice Manmohan Singh chuan rinhlelh pali- Farman, Pawan, Sunder Singh leh Sunny Uppal te chu court-in SC/ST Act tlawhchhana thubuai a siamsakte hlip tura Central Bureau of Investigation (CBI)-in a ngensak chungchangah insawifiah tura hriattir an ni, a ti.

Rinhlelh pali zinga Farman-a hi Tihar jail-ah judicial custody-a dah a ni a, midang pathum erawh bail-a chhuahtir an ni.

Rinhlelhte thubuai hi Court-ah ngaihtuah mek a ni a, HC chuan thubuai hi July 17-ah a ngaihtuah leh ang.

Nido Tania-a pa, Nido Pavitra chuan sessions court-in September 25, 2014-a rinhlelhte chu Sche­duled Castes and Scheduled Tribes (SC/ST) (Prevention of Atrocities) Act, 1989 tlawhchhana thubuai siamsak theih an ni lo ang tia thutlukna a lo siam tawh chu advocate Prashant Mendiratta hmangin Delhi High Court-ah a khinglet a, hemi chungchang hi ngaihtuah mek a ni.

Nido Tania-a postmortem report a chhuah hnuah rinhlelhte hi police te chuan Indian Penal Code (IPC) section 302 leh SC/ST Act tlawhchhanin thubuai an siamsak a ni.