Vantlang bungrua tihchhiat thubuaiah KSU president man

Kum 2013-a Khasi Students' Union (KSU) te'n Meghalaya-a Inner Line Permit (ILP) system kalpui an phutna kaihhnawiha nawrh an huaihawtnaa van­tlang bungrua ṭhahnem tak an tih­chhiat thubuaiah Ningani khan police te'n KSU president Daniel Khyriem an man.

Meghalaya sorkar chuan vantlang bungrua tichhiat thubuai ngaihtuah tur hian special court a din a, KSU hotu Khyriem-a hi Meghalaya Maintenance of Public Order Act tlawhchhanin, van­tlang bungrua vaibelchhe 31 hu tihchhiat thubuai siamsak a ni.

Police te'n an man hnuah Khyriem-a hi chief judicial magistrate (CJM) K M L Nongbri court-ah hruai a ni a, court-in bailable warrant a siamsak chu hnarin, bail a duh lo a, jail-ah dahluh nghal a ni. Court chuan ni 14 chhung judicial custody-a awm turin a chung thu a relsak a ni.

CJM court-a KSU hotu Khyriem-a thubuai ngaihtuah a nih lai hian KSU member pungkhawmte chuan an president man a nih vanga an lungawi loh thu leh a rang lama chhuah zalen tura an phut thu an tarlang.

KSU president man a nih avang hian Shillong-a KSU member lungawi lote chuan hmun hrang hrangah tharum thawhna an thlen nghal a, Polo hmuna hnamdang dawr pakhat an hal bakah Lumdiengjri hmunah Veterinary department motor pakhat an hal.

Khyriem chuan amah ṭantute chu a chhuah zalenna tur chauh phut lo tur leh state sorkar laka an pawl thil phut chu ngai pawimawh zawk tura a duh thu a sawi.

"State sorkarin kan thil phut chu kar khat chhunga a tipuitling lo a nih chuan na zawka nawrh huaihawt turin inbuatsaih rawh u," tiin Khyriem chuan KSU member lungawi lote hmaah a sawi.

KSU hi Meghalaya-a ILP system kalpui phuttu, tlawmngai pawl hrang hrang ṭangrual zinga a sulsutu a ni.