APCC-in stapled visa chungchang sawichhuak turin PM Modi a phût

Arunachal Pradesh Congress Committee (APCC) chuan Prime Minister Narendra Modi-a'n ni thum cham tura China a tlawh hunah Arunachal mite hnena China-in stapled visa a pek ṭhin chungchang leh ram inchuh chungchang a sawichhuak tur a ni, a ti.

APCC president Padi Richo chuan, "Prime Minister Modi-a'n China a tlawh tur chu media report aṭanga a lan danin a pawimawh hmel hle a, mahse China thuneitute hnena thil pakhat a sawi hmaih loh tur chu China-in a rama anga Arunachal Pradesh a sawi ṭhin chungchang hi a ni," a ti.

APCC president chuan Union Minister of State for Home Affairs Kiren Rijiju chu China tlawh tur zinga thlang tel ve turin Prime Minister Modi an ngen bawk.

"Nikum September 18-a China President-in India a tlawh ṭuma inbiakna an neihah NDA sorkar chuan Rijiju-a a teltir tawh lo tih a theihnghilh tur a ni lo," a ti.

Richo chuan Arunachal mi China tlawh tumte hnena China-a stapled visa a pek ṭhin chungchang sawiin, "Prime Minister Modi-a sorkar aṭangin kum khat a liam ta a, mahse Modi chuan stapled visa chungchang eng mah a la sawi lo a, China tlawh tum Arunachal mite lo dangtu, stapled visa chungchang hi China a tlawh hunah Modi-a'n a theihnghilh tur a ni lo," tiin a sawi.

Ram pathum tlawh tumin Prime Minister Modi hi kar leh hian a zin chhuak dawn a, May 14 aṭanga 16 thleng China-a a cham hnuah Mongolia leh South Korea a tlawh bawk ang.