Nagaland-ah all-party sorkar a piang

Nagaland-a rorellai Naga People's Front (NPF) party MLA ṭhenkhat an hel avanga party chhunga buaina chinfel a nih hnuah Chief Minister TR Zeliang chuan kar kalta Zirtawpni khan a tawpna atan a cabinet-ah minister a lakluh belh leh a, minister leh parliamentary secretary-ah NPF, BJP leh Congress MLA an tel kim vek. Independent MLA te chu parliamentary secretary-ah dah an ni bawk.

Minister thar atan hian mi pathum lakluh an ni a, parliamen­ta­ry secretary-ah pakua lakluh an ni.

Minister atana mi pathum lakluhte hi parliamentary secretrary ni lai, NPF MLA pahnih – Yitachu leh Vikheho Swu bakah Congress Legislature Party hotu Tokheho Yepthomi te an ni.

NPCC president hlui SI Jamir chu Cabinet status pek niin, Adviser to the Chief Minister-ah ruat a ni bawk a, Congress MLA Imtikumzuk chu Deputy Speaker-ah ruat a ni bawk. Deputy Speaker ni lai, Independent MLA Levi Rengma chu Parliamentary Secretary-a ruat a ni bawk.

Parliamentary Secretary thar pakua zingah hian NPF MLA pali- Shetoyi, Pukhayi Sumi, EE Pangteang leh Dr Benjongliba Aier te an tel a, a bak pangate chu Congress MLA - Khekaho Assumi, Eshak, Dr Imtiwapang Aier, Hukavi leh C Apok Jamir te an ni.

Chief Minister Zeliang hian kumin April 27 khan a cabinet post ruak hnawh khatin minister pakhat a ruat belh tawh bawk a, hemi ṭum hian parliamentary secretary panga a ruat tel bawk.

April 27-ah cabinet post ruak hnawhkhah nan parliamentary secretary ni lai, BJP MLA Paiwang Konyak chu minister-ah lakluh a ni a, Transport leh Information & Public Relations portfolio pek a ni a, hemi ṭuma Parliamentary secretary panga ruatte hi Independent MLA pali leh BJP MLA pakhat an ni.

Nagaland Chief Minister Zeliang-a kaihhruai, Democratic Alliance of Nagaland (DAN-III) sorkarah hian Chief Minister hoin cabinet minister 12 an awm a, cabinet rank nei adviser pathum an awm bakah parliamentary secretary 24 an awm.

Kumin January 5 khan NPF MLA 22 te chu a Chief Minister Zeliang-a lakah an hel a, hei vang hian NPF MLA hel zinga minister pali chu ban an ni a, NPF MLA helte hian Chief Minister lakah no-confidence motion pulutin, February 5 khan sorkar fiah a ni a, member 60 awmna Assembly house-ah Zeliang hi Speaker tel loin MLA 59-in an thlawp a ni.

Hemi aṭang hian a hmaa eptu party ni ṭhin, Congress party pawh Zeliang-a kaihhruai DAN-III ah a tel a, hetihlai hian BJP chuan Congress ṭanrualpui hi an duh lo thu an sawi thung. April 17-a BJP national president Amit Shah-a'n Nagaland, Dimapur a tlawh ṭumin Congress thawhpui an duh lo thu hi sawi lan a ni.

NPCC president K Therie chuan NPF kaihhruai DAN-III sorkarah BJP thawhpui mah se chi leh sakhua inthliarna lam hawi chu thlawp an tum loh thu a sawi.

Member 60 awmna Nagaland assembly-ah hian NPF-in MLA 38 a nei a, BJP-in pali, JD(U)-in pakhat, INC-in pariat, Independent-in pariat leh NCP-in MLA pakhat a nei a ni. Kum 2013 assembly inthlanah NCP aṭangin MLA pali thlantlin niin, BJP aṭangin pakhat thlantlin a ni a, mahse nikum June thla khan NCP MLA pathum chuan an party chhuahsanin BJP an zawm a ni.