Nagaland Cong MLA 8 AICC-in a suspend

All India Congress Committee (AICC) chuan Nagaland Congress MLA pariat, NPF kaihhruai, Democratic Alliance of Nagaland (DAN-III) sorkar thawhpuitute chu May 9 aṭangin a suspend a, ni sarih chhunga an chunga action lak a nih loh tur chhan insawifiah turin a hriattir.

AICC in-charge North Eastern States V. Narayanasamy chuan Nagaland Congress MLA pariatte hi hriattirna pein, AICC president Sonia Gandhi-in BJP telna DAN-III sorkar thawhpui lo tura hriattirna a pek hnuah Congress MLA pariatte hian DAN-III hi an zawm a ni, a ti.

Narayanasamy chuan NPCC president K. Therie-a'n May 6 khan Congress party chuan BJP telna DAN-III sorkar a thawhpui loh tur thu a lo sawi tawh tih a tarlang bawk a, AICC president thuchhuak angin Therie chuan May 8 khan Nagaland Congress Legislature Party hotu Tokheho Yepthomi hnenah Congress MLA pariatte chu NPF kaihhruai, DAN-III sorkar zawm lo turin a lo hriattir tawh thu a tarlang bawk.

AICC hotu Narayanasamy chuan Nagaland Congress MLA pariatte chu AICC thuchhuak palzutah puhin, insawifiah tura hriattirna pek an ni, a ti.