ILP system phutna kaihhnawihah NGO te an inhmukhawm

Meghalaya-a inner line permit (ILP) system kalpui phuttu, tlawmngai pawl hrang hrangte chuan Khasi Students’ Union (KSU) president chhuah zalen tura state sorkar hun an bituksak, dar kar 48 chu kar kalta Inrinni khan a tawp a, nimin khan hmalak zel dan tur relin meeting an ko nghal.

KSU President Daniel Khyriem hi kum 2013-a ILP system kalpui phutnaa tlawmngai pawl hrang hrang ṭangrual te'n vantlang bungrua an tihchhiat thubuaiah state sorkar chuan thubuai siamsakin, kar kalta Ningani khan police te'n an man a, tlawmngai pawl ṭangrualte chuan Khyriem-a chhuah zalen nan state sorkar chu dar kar 48 chhung hun an pe a, an hun pek chhunga chhuah zalen a nih loh avangin tha thara hmalak an tum a ni.

Federation of Khasi Jaintia and Garo People (FKJGP) president Joe Marweiñ chuan an thil phut chungchangah state sorkar aṭanga chhanna an hmuh loh avangin an hmalak zel dan tura rela meeting an koh thu a sawi.

KSU president man a nih chungchangah hian Chief Minister Mukul Sangma chuan tun hnai khan state sorkar chu dan tlawhchhan zela kal a nih thu a sawi.

Meghalaya-a ILP system kalpui phuttu, NGO hrang hrangte lakah hian state sorkar chuan vantlang bungrua tihchhiat thubuai 87 a siam a, heng zingah thubuai 82-ah chargesheet thehluh a ni bawk.

Meghalaya sorkar chuan vantlang bungrua tichhiat thubuai ngaihtuah tur hian special court a din a, Meghalaya Maintenance of Public Order Act (MMPO) tlawhchhanin mi 80 chuang man an ni a, mahse heng mite hi bail-a chhuahtir vek an ni.

KSU president Khyriem-a man a nih hnuah Shillong leh Khasi Hills district dangah tharum thawhna a thleng nghal zui nghal a, hetihlai hian security force te chuan khauh zawkin venhimna an kalpui nghal.

Chief Minister Mukul chuan sorkar vau zawnga thutawp siamsak chu chin tawh loh a duh thu a sawi.

NGO ṭangrual te'n KSU president chhuah zalen tura dar kar 48 chhung hun tiam an siamsak thu sawiin Chief Minister chuan pawl hrang hrang te hnen aṭangin hetiang anga vauna hi vawi eng emaw zat a dawn tawh thu leh state hmasawnna atana a ṭhat loh thu a sawi.

"NGO, political party emaw tlawngngai pawl ṭangrual pawh ni se sorkar vau zawnga thutawp leh hun tiam siamsak hi kan bansan a ṭul tawh a ni, sorkar chuan dan ang zelin ro a rel ṭhin a ni," a ti.