Bangladesh mite'n PM scheme dawn remti lo

Prime Minister Narendra Modi ruahmanna hnuaia social security scheme pathum kalpui tur chu All Assam Students Union (AASU) chuan dan phal loha Bangladesh mi, Assam-a awmte dawn an remti lo.

Social security scheme pathum - Pra­dhan Mantri Surak­sha Bima Yojana, Pra­dhan Mantri Jeevan Jyoti Yojana leh Atal Pen­sion Yojana te hi kar kalta Inrinni khan Prime Minister Modi-a'n Kolkata-ah a tlang­zarh.

AASU chuan thuchhuah an siamah scheme pathumte hi dan phal loha Bangladesh mi, Assam-a awm te'n an dawn loh nan a venna siam tura sorkar laipui an duh thu an tarlang a, hetihlai hian Bangladesh mite an rama thawnkir tur chungchangah zawhna an siam bawk.

"Eng tikah nge Prime Minister Narendra Modi-a kaihhruai sorkar laipuiin India-Bangladesh ramri a khar ang? Eng tik nge sorkar laipuiin Assam Accord zulzuiin Assam-a phalna nei loa Bangladesh mi awmte hi Dhaka-ah a thawnkir ang?" tiin AASU thuchhuak chuan a tarlang.

AASU chuan Assam-ah phalna nei loa pemlut an la awm reng thu a tarlang bawk a, hetihlai hian state sorkar leh sorkar laipui chu engmah tiloah a puh bawk.

AASU president Dipanka Kr Nath leh general secretary Lurinjyoti Gogoi chuan, "Prime Minister-in Jan Dhan Scheme a tlangzarh ṭumin Bangladesh mite chu he scheme a telh an nih loh nan hmala turin kan ngen a, mahse kan ngenna hi a chhang lo a ni," tiin an tarlang bawk.