Fruit wine-in Arunachal economy tilian thei: Expert

Arunachal Pradesh-a kiwi thei tharchhuah aṭanga theitui hralhchhuah tur hlawhtling taka siam a nih hnuah mithiamte chuan state economy dinhmun siamṭhat nan sorkar chu fruit wine siamchhuahna lam ngaihtuah turin thurawn an pe.

Arunachal hi India rama kiwi thei tharchhuak tam ber a ni a, kum khatah metric tonne 4,720.5 a tharchhuah bakah apple MT 30,945.2, serthlum (citrus) MT 1,76,707 leh lakhuihthei MT 67,580 a tharchhuak bawk.

Official data-in a tarlan danin Arunachal hian horticulture atana ram hman theih hectares nuai 18-a zau a nei a, hemi aṭang hian hectare nuai 1.13 chauh la hman a ni.

Itanagar-a 'Arun Kiwi Wine' tlangzarhnaah Pune-a Hill Crest Foods and Beverages Pvt Ltd director Akalpit Prabhune chuan May 6 khan fruit wine chu Arunachal tana sum hnar ṭha tak a nih theih tur thu a sawi a, state sorkar chuan thei chi hrang hrang an tharchhuah aṭangin hralhchhuah tura wine siam dan a ngaihtuah a ṭul a ni, a ti.

Prabhune chuan Arunachal sorkar chu wineries siam duhtu, loneitute hamṭhat nan wine policy dung chhuak se a duh thu a sawi bawk.

Bengaluru-a consultant Rag­hunath W Khare pawhin Aru­nachal-a serthlum wineries siam a nih chuan loneitute sum lakluh a punbelh tur thu a sawi a, hralh atana tlak loh serthlumte chu wine siam nana a hman tlak thu leh, paih tur aṭanga suma chantirna a nih thu a sawi.

Khare chuan wineries chu hmeichhiate hna siamsaktu a nih theih thu a sawi bawk.