Health scheme dawng tur an tam
Meghalaya sorkarin tunhnaia Megha Health Insurance Scheme thawh hnihna a tlangzarh chu state mipui nuai 15-in a dawn theih tur thu state Health Minister AL Hek-a'n a sawi.
"State mipui zawng zawng chuan he hamṭhatna hi an dawng thei dawn a, he scheme kaltlangin state sorkar chuan damdawia an inenkawlna senso a tumsak dawn a ni," a ti.
Damdawi-ina enkawl an nihin cheng 1,60,000 thleng an dawng thei ang a, chhungkaw pakhatah mi panga zel a huam ang. Hetihlai hian chhungkaw tinin kum khatah he scheme atan hian cheng 31 an chawi a ngai thung ang.
Health Minister Hek chuan insurance scheme hian natna tlanglawn deuhte chu a huam vek tur thu leh a dawng thei tura kum bithliah a awm loh thu a sawi bawk. Scheme dawng turte hi card siamsak an ni ang a, North Eastern Regional Institute of Health and Medical Sciences (NEIGRIHMS) leh Meghalaya-a private hospital lian zualahte a thlawnin an inenkawl thei ang. State pawn damdawi-in, Assam-ah pathum, Tamil Nadu, Andhra Pradesh leh Delhi-a damdawi-in pahnih ṭheuh bakah Karnataka leh Haryana-a damdawi-in pakhat ve vete scheme kalpuina atana thlan a ni.
Megha Health Insurance Scheme thawh hnihna kalpuina atan state sorkar chuan New India Assurance Company Ltd a thawhpui a, June 1 aṭangin kalpui ṭan a ni ang.