Sikkim: ST list-a dah tur buapui turin high-level committee din

Sikkim sorkar chuan Sikkim hnam 12-te scheduled tribes list-a dah an nih theih dan buaipui turin Sikkim State High Level Committee (SSHLC) din a nih thu a puang.

Committee-ah hian anthropology, sociology leh regional development a mithiam tak tak dah an ni. Sikkimese hnam 12 India Scheduled Tribe (ST) a dah an nih theihna turin hma an la dawna, report ṭha tak thehlut turin thla thum hun pek an ni bawk.

ST list-a dah tum hnam 12-te chu - Bhujel, Gurung, Jogi, Kirat Khambu Rai, Kirat Dewan (Yakha), Khas (Chettri-bahun), Mangar, Newar, Sanyashi, Sunuwar (Mukhia), Thami leh Majhi te an ni. ST a dah an nih theihnan hian an socio-cultural, historical leh geographical background an chhui dawn a, committee chuan heng hnamte hian India danpuiin ST status pek theih tur criteria a siamte an paltlang em tihte an enfiah ang.

Committee hi Anthropological Survey of India-a director, Prof. B.V. Sharma chuan hoin, member ah hian Jawaharlal Nehru University-a professor Mahendra P. Lama, Tata Institute of Social Sciences-a deputy director hlui Prof. Virginius Xaxa bakah anthropology leh social sciences lama mi zah kai tak takte an tel bawk.