NEC aṭangin MP Bezbaruah a bang

UPA sorkarin official atana a ruatte Prime Minister Narendra Modi-a kaihhruai sorkarin a banna nia ngaihah sorkar laipui chuan North Eastern Council (NEC) member MP Bezbaruah chu bang turin a hriattir.

Hmarchhak mite chanchin zirchiang tura UPA sorkarin kum 2014, February thlaa a din, Bezbaruah Committee-a chairman MP Bezbaruah chuan banna chu thla khat liam ta khan a thehluh tawh thu leh a banna chu pawm a nih tawh thu a sawi.

Bezbaruah chuan a banna chu Prime Minister Modi hnenah a thehluh thu sawiin, Thawhṭanni khan pawm a ni tih hriattirna a dawn thu a sawi. NDA sorkar chuan NEC member atan hian mi thar pahnih a ruat tur thu a sawi bawk.

"NDA sorkar chuan sorkar agency hrang hrangah an party mi leh sate an ruat duh avangin bang turin mi hriattir a ni. NEC chu hmarchhak bial hmasawnna atan a pawimawh a, member atan mi dang tu pawh an ruat chuan hmarchhak bial mipuite duhdan leh hmasawnna tur ngaipawimawh se la tih ka duh ber a ni," a ti.

Bezbaruah hi Assam mi niin, 1964 batch IAS officer a ni a, Prime Minister Atal Bihari Vajpayee hun laiin Union tourism secretary hna a lo chelh tawh bawk.