NITI Aayog-in hmarchhak bial retheihna dolet dawn

Planning commission thlak tura NDA sorkarin a din, National Institution for Transforming India (NITI) Aayog chu hmarchhak biala retheihna doletna atana hman a nih tur thu Union Minister for Planning Rao Inderjit Singh chuan a sawi.

Union Minister Singh chuan he thu hi Rajya Sabha inkhawma Meghalaya MP Wansuk Syiem-i zawhna a chhannaah a sawi a, NITI Aayog chuan hmarchhak bial retheih chhan chu a zirchian tur thu leh a doletna atana rawtna a siamte a thehlut dawn a ni, a ti.

Zirchianna report hi June thla laihawl vela an thehluh hman a beisei thu Union Planning Minister chuan sawiin, NITI Aayog chu Planning Commission kal anga a kal tur thu a sawi bawk.

Sorkar laipuiin a ṭhiah tak, Planning Commission khan record a buatsaihah Assam, Meghalaya, Manipur, Mizoram leh Nagaland-ah retheihna chu kum 2009-10 chhung khan a hluar zual tiin a tarlang a, hemi hun chhung hian thingtlanga puitling pakhatin khawsakna atan ni khatah cheng 22.40 chauh a nei anga chhut a ni a, khawpuiah puitling pakhatin ni khatah cheng 28.65-in khawsak a rel thung.

Planning Commission record chuan kum 2009-10 chhung khan thla khata Meghalaya state per capita income chu thingtlangah cheng 686.9 leh khawpuiah cheng 989.8 chauh a ni tih a tarlang bawk a, Meghalaya-a mi nuai li chuang chu below poverty line (BPL) a awm an ni, a ti.