Pressure group te'n sit-in protest huaihawt dawn

13th May, 2015

Meghalaya-a inner line permit (ILP) system kalpui phûttu, pressure group hrang hrang ṭangrualte chuan vawiin aṭangin an lungawi lohna lantir nan sit-in protest huaihawt an tum.

Pressure group ṭangrualte hian an state sorkarah thil phût pahnih neiin an thil phût tihhlawhtlin nan state sorkar chu darkar 48 chhung hun an pe a, an hun pek hi kar kalta Inrinnia a tawp hnuah Thawhṭanni khan hmalak zel dan tur relin an ṭhukhawm leh a, vawiin aṭanga sit-in protest neih an rel a ni.

Ṭangrual pawlte hian kum 2013-a ILP system kalpui phutnaa vantlang bungrua an tihchhiat thubuaia state sorkarin thubuai a siamsak, Khasi Students' Union (KSU) president Daniel Khyriem chhuah zalen an phût bakah ILP kalpui phûttu, pressure group hruaitute laka state sorkarin Special Court-a thubuai a siamsakte chu thudelhkilh awm loa hlihsak vek an phût bawk.

Federation of Khasi Jaintia and Garo People (FKJGP) president Joe Marweiñ chuan sit-in protest chu Additional Secretariat-a parking area-a neih an tum thu leh hemi atan hian phalna lak hmasak an tum thu a sawi.

Hynniewtrep National Youth Front (HNYF) general secretary Sadon K Blah pawhin pressure group hruaitute thubuai hlihsak an phût chungchang chu sawiin, state sorkar nena inbiakna an neih hnuhnung berah state sorkar chuan thubuai chu hlihsak a tum tih a tarlang a, mahse thutlukna a la siam theih loh thu leh a la bawhzui loh thu a sawi.

FKJGP hotu Marwein chuan thubuai hlihsak chungchangah state sorkar chu a thutlukna tichiang thuai tura a duh thu leh KSU president chu chhuah zalen thuai a duh thu a sawi.

Kar kalta Ningani khan KSU president Khyriem hi vantlang bungrua tihchhiat thubuai special court-in a siamsak avangin man a ni a, bail dil phalna pek ni mahse Khyriem hian bail warrant hi a hnar a ni.

Hetihlai hian Jaintia Students’ Union (JSU) pawhin KSU president hi an thlawp thu tarlangin, chhuah zalen thuai an duh thu an tarlang.

JSU finance secretary H Symblai chuan buaina lian tham zawk a chhuah hmain state sorkar chu KSU president chhuah zalen thuai tura a phût thu a tarlang.