Manipur: Security force ten ralthuam man

Central force leh state force ṭangkawpin thingtlang khua leh Manipur-Myanmar ramria ralthuam zawn beihpui an thlakna kal mekah silai, silaimu leh puak thei thil ṭhahnem tak an man.

Tengnoupal District-a Samukom area, Myanmar ramria helpawlte awmna camp-ah Assam Rifle, Indo-Tibetan Border Police leh Manipur Police thawk ho chuan ralthuam leh a kaihhnawihte hi an man a ni.

An ralthuam mante hi pistol pahnih, Pompi lian pahnih leh a te pakhat, 7.62mm live round pariat, pistol round hnih, IED pakua, high explosive pompi grenade pariat, Explosive material cake pahnih, hand grenade 36 leh Walkie Talkie pahnih te an ni. Heng ralthuam an hmuhna, Samukon area hi Kuki-Zo mipui chen tamna hmun a ni. Ralthuam mante hi Manipur police-te kutah chhui chian turin an hlan nghal bawk.

Hei bakah hian Indian Army, Manipur Police leh Central Reserve Police Force (CRPF) ten buaina chhuahna hmun, Churachandpur district-a ralthuam zawn beihpui an thlaknaah Thanjing Ridge area-ah ramchhung siam silai leh rocket ft 8 a sang pahnih bakah rocket ft 7 a sang pahnih leh medium-sized mortar leh silaimu ṭhahnem tak an man bawk a ni.