Meghalaya: NEHU zirlaiten tiam chin awm loa chaw ngheia nawrh huaihawt

Meghalaya-a North- Eastern Hill University (NEHU) zirlaite chuan an thil phutin ngaihven a hlawh ṭhat tawk loh avangin November 5 aṭang khan tiam chin awm loa chaw ngheia nawrh an huaihawt ṭan. Nimin aṭang khan university pawh hna thawk thei loa khar, lockdown an tum bawk.

University zirlaite hian thil phut hrang hrang an nei a, heng zingah hian registrar leh deputy registrar te an nihna aṭanga ban tir, Tura campus-a Vice-Chancellor dah, PGSU inthlan buatsaih leh an thil mamawh dangte ennawn te a tel.

NEHU zirlaite lungawi lohna lantirna hi KSU NEHU Unit leh Meghalaya Tribal Teachers' Association (MeTTA), NEHU ten an thlawp bawk. Hetih mek lai hian university non-teaching staff te pawhin an thil phutin ngaihven a hlawh theih nan lungawi lohna an lantir ve mek bawk a ni.

NEHU Student Union (NEHUSU) general secretary, Toniho Kharsati chuan vice-chancellor Professor Prabha Shankar Shukla meeting an neihpui hnuah,VC hian memorandum hrang hrang hmanga an thil phut an thehluh ṭhinte chu a ngaihven tak tak lo niin a sawi.

Tunkar tir khan Garo Students Union (GSU) chuan Vice-Chancellor hnenah hian Tura Campus-a Pro Vice-Chancellor (Pro-VC) Tura dah tura an phutna lehkha pawh an lo thawn tawh. Hei bakah zirlai pawl hian PGSU inthlan chu a rang lama neih a ṭul thu sawiin, zirlaite chuan harsatna an neih changa thuneitute hnena thlensak a, an aiawhtu tur an mamawh thu an sawi bawk.