Covid - 19 Hmarchhakah hri leng ziaawm thei lo

Hmarchhak state zinga Covid-19 kai leh he hri thihpui tamna ber state, Assam-ah chuan hri kai an pung chak hle a, Ningani khan hri kai hmuh chhuah thar mi 508 an awm leh. 

Hemi ni vek hian hripui vanga thi mi pasarih an awm bawk a, anni nen hian Assam-a Covid-19 thihpui hi mi 896 an tling tawh a ni. 

Health and family welfare minister Himanta Biswa Sarma chuan coronavirus kai hmuh tawh hi mi 2,03,282 an ni tawh tih a sawi. Hri kai zinga 1,77,659 chu enkawl dam an ni tawh a, hri kai mek  24,724 an la awm. State recovery rate hi  87.39% a ni a, fatality rate hi 0.44% a ni. Ningani thleng khan sample nuai 44.72 test a ni tawh a, sample test aṭanga positive hmuhchhuah zat hi 1.48%  a ni. 

State chhunga  hri kai enkawl dam tawh zinga 1,717 chuan hri kai enkawlna turin an plasma an donate tawh. State chhungah plasma bank hi panga a awm. 

Manipur-ah Ningani khan coronavirus kai hmuh chhuah thar mi 345 awmin, hemi ni hian hripui vangin mi pathum an thi bawk. Manipur-a hripui vanga thi hi mi 127 an tling tawh a ni. 

State Covid-19 common control room chuan Covid-19 vanga thi mi pathumte hi mipa pahnih leh hmeichhia pakhat niin kum 70, 58 leh 35 mi an nih thu a tarlang. 

Hri kai hmuh chhuah thar zingah Central Armed Police Force mi paruk an tel. Hri kai thar zingah mi pasarih chauh chu hmun danga zin chhuahna nei niin, a dangte chu tualchhung aṭanga an kai chhawn vek a ni. 

Manipur-ah hian Covid-19 kai hmuh chhuah tawh chu mi 16,621 niin an zinga 12,393 chu enkawl dam an ni tawh a, enkawl mek mi 4,1010 an awm. 

Arunachal Pradesh-ah hri kai hmuh chhuah tawh mi 13,912 an awm.

Ningani khan hri kai hmuh chhuah thar mi 134 an awm a, hri kai enkawl dam 164 an awm thung. 

Hri kai hmuh tawh zinga 11,199 chu an dam leh tawh a, recovery rate hi 80.49% a ni. Hripui thihpui hi mi 31 an awm tawh bawk. 

Meghalaya-ah chuan Ningani  khan Covid-19 kai enkawl dam mi 307 awmin, ni khatah hri kai dam tam ber ni a thleng. Hemi ni vek hian hri kai hmuh chhuah thar mi 99 awmin, hripui vanga thi mi pakhat a awm bawk. 

State chhunga hri kai hmuh tawh hi mi 8,720 an tling tawh a, an zinga 6,981 chu an dam leh tawh a ni. 

East Khasi Hills district-ah hri kai enkawl mek an la tam ber a, mi 1,070 an awm. Ri Bhoi-ah mi 169 leh West Garo Hills-ah hri kai mek 164 an la awm bawk. Official-te chuan Ningani thleng khan swab sample nuai 1.93 endik a nih tawh thu an sawi. 

Nagaland-ah Ningani khan Covid-19 kai hmuh chhuah thar mi 157 an awm a, heng mite nen hian hri kai hmuh tawh hi 8,296 an tling tawh a ni. 

Hri kai hmuh thar zinga 119 hi Dimapur mi niin, 30 hi Kohima mi an ni a, Peren mi pathum, Mokokchung leh Kiphire khaw mi pahnih ve ve leh Mon khuaa mi pakhat an ni. 

Principal secretary (home) Abhijit Sinha chuan hri kai zinga 6,399 chu an dam leh tawh a, hri kai mek 1,798 an la lawm tih a sawi. Hripui thihpui hi mi 22 an awm tawh bawk. 

Tripura-ah Covid-19 kai enkawl mek zinga pahnih chu Ningani khan an thi a, anni nen hian an state-a hripui thihpui hi mi 331 an awm tawh a ni. 

Hri kai hmuh thar mi 125 awm bawkin, state chhunga Covid-19 kai hmuh chhuah tawh hi mi 29,925 an tling tawh a ni. 

Health official-te chuan an state-a Covid-19 vanga thi zinga mi 174 chu state khawpui, Agartala ami an ni tih an sawi. Hri kai hmuh tawh zinga 27,229 chu an dam leh tawh a, mi 23 chu state dangah inenkawl turin an haw.  Ningani thleng khan sample 4,41,345 test a nih tawh tih official-te chuan an sawi bawk. 

Sikkim-ah Ningani kha hri kai hmuh chhuah thar mi 49 an awm. 

State puma hri kai hmuh tawh hi mi 3,727 an tling tawh a, an zinga 63 in an thipui tawh a ni. 

Hri kai zinga mi 3,328 chu enkawl dam an ni tawh a, state danga inen­kawl tura haw mi 82 an awm bawk a ni. Sample hi 55,073 test a ni tawh bawk.