Assam: Assam, Meghalaya leh Arunachal ramri buaina sawipui

Union home secretary Govind Mohan chuan Assam, Meghalaya leh Arunachal Pradesh-a senior official-te chuan ramri buaina chinfel dan tur a sawipui. State pathuma chief secretary-te hian union home secretary chu a hranpaa hmuin an lungawi lohna te an thlen a ni.

Kumin August thlaa home secretary nihna chelhtu, Mohan chuan Meghalaya leh Arunachal Pradesh ten Assam nena ramri chungchang buaina an neih ti tawp tura agreement an ziah pawh a ennawn nghal bawk. He meeting hi Assam sorkar huaihawt ni mah se, sorkar laipui leh state pathum aiawhte inbiakdan hi sawi chhuah a la ni lo. Meeting dang lehah Assam tuilian avanga Arunachal leh Meghalaya-a tui luang lut nasa lutuk chungchang pawh sawi ho a ni bawk.

Mohan hian Rabha Hasong Autonomous Council, Tiwa Autonomous Council leh Mising Autonomous Council-a chief executive councillor-te pawh meeting neihpuiin an harsatna neihte an sawiho. He hunah hian Assam education minister Ranoj Pegu pawh a tel a ni.

Thawhlehni khan Union home secretary hian helpawl hrang hrang aiawhte hmuin peace accord an ziah tawh ṭhenkhat a ennawn bawk.

Assam sorkar hian February-a assembly session an neihah khan an ṭhenawm state - Arunachal Pradesh, Nagaland, Meghalaya leh Mizoram ten Assam ram chin hectare 83,000 a zau an luah thu a tarlang. Nagaland chuan hectare 59,490 an luah a, Meghalaya-in luah tlem berin hectare 3,441.86 a ni a, Arunachal Pradesh-in hectare 16,144.01 leh Mizoram-in hectare 3,675.78 a zau an luah niin an sawi.