Arunachal : TRIHMS-ah MBBS seat 100 ah ti pung

Arunachal Pradesh-a medical college hmasa ber, Tomo Riba Institute of Health and Medical Sciences (TRIHMS)-a MBBS seat awmzat chu academic year thar atan 50 aṭangin 100 ah tih pun a ni.

Cheif minister Pema Khandu chuan TRIHMS-a MBBS seat 100 siam a ni thei ta chu an state tana thil chhinchhiah tlak a nih thu sawiin, hei hi he college din a nih tirh aṭanga an tum ber a nih thu a sawi bawk.

TRIHMS-in academic year thar atana zirlaite lawmna hun a hmanpuinaah Chief Minister hian he thu hi a sawi a, an state mi leh sa ngeiten medicine lama zirna ṭha leh seat tam zawk an nei thei ta chu a lawm takzet tih a sawi. He institution-a MBBS seat 100 awm aṭang hian Arunachal Pradesh tan seat 85 dah a ni.