Tripura: Pradyot Debbarma-a'n ramri venhimna ṭha lo ngaihven ṭul ti

Tripura lal thlah leh Tipra Motha dintu, Pradyot Kishore Manikya Debbarma chuan Tripura ramria venhimna ṭha tawk lo chu ngaihven a ṭul hle tih a sawi.

Bangladesh border kaltlanga an state-a luh ruk tum mi 10 zel an manah, man loha lut ru hi mi za chuang awm zel ang a ni ang, a ti.

Tripura leh Bangladesh hian ramri km 856 a thui neiin, dan phal loha ramri kaltlanga luh tum hi an tam ṭhin hle. Debbarma chuan kum 2019-a ramri kaltlanga Tripura-a mi lut lai video-a lak fuh chu X-ah a post bawk. "Hemi chungchang hi kum nga dawn liam taah ka lo sawi tawh a ni. He video la tu ngei pawh hi tunah pawh chuan minister of state a ni tawh. Bangladesh ramri ah hian mi 10 man a nih chuan man loha lut ru za chuang an awm ang. Tripura emaw, hmarchhak leh India ram hmun dangah te an awm zui a ni. Kum nga a liam ta, mahse thil inthlak danglam engmah a la awm lo," tiin a sawi.

Tun hnai mai, November 6, 2024 pawh khan Government Railway Police(GRP) ten Bangladesh mi pathum Agartala Rel Station ah anlo man tawh a, an zingah hian hmeichhia pakhat a tel bawk.