Sorkarin mipui ngaihdan dah pawimawh dawn

National Socialist Council of Naga­lim (I-M) nena remna zawnga inbiakna an kalpui mekah sorkar laipui chuan Nagaland mipuite leh stateholder te ngaihdan a dah pawimawh tur thu a sawi.

Ministry of Home Affairs (MHA) official chuan he thu hi sawiin, Naga peace talk-a sorkar laipui aiawhtu, Joint Intelligence Committee (JIC) chairman RN Ravi chuan ni thum chamin Nagaland a tlawh tur thu leh pawl hrang hrang aiawhte inbiakna a neihpui tur thu a sawi bawk.

Official chuan hun kaltaa Naga peace talk an lo kalpui tawhah mipuite ngaihdan dah pawimawh a nih ṭhin loh thu a sawi a, mahse tun ṭumah chuan sorkar laipuiin mipui ngaihdan dah pawimawh a tum a ni, a ti.

Tlawmngai pawl hruaitute leh khawtlang mipui aiawhte inbiakna neihpui an tum chungchang chu MHA-in Nagaland assembly Speaker a hriattir tawh thu a sawi bawk.

Naga peace talk chungchangah hian Naga Students’ Federation (NSF) chuan vawiin hian consultation meeting a buatsaih a tum bawk a, meeting-ah hian RN Ravi leh hmarchhak state danga zirlai pawl lian hruaitute pawh an tel turin an sawm a ni.

RN Ravi-a'n ni thum chama Nagaland a tlawh hunah hian official-in NSCN (I-M) hruaitute a be dawn em tih a la chiang lo a, mahse inbiakna kalphung an lo thlak tawh angin, NSCN (I-M) hruaitute chuan official lo pawhin interlocutor Ravi hi an rem chan hunah an be reng thei thung.

Naga peace talk-ah hian thil pawimawh eng emaw chen chinfel tawh a ni a, sorkar laipui chuan kumin chhung ngeiin remna tluantling siampui a tum.