AR lambunnaah ULFA-I an tel

Nagaland, Mon district-a May 3-a Assam Rifle tui chawi motor lambunnaa mi pariat thihnaah khan United Liberation Front of Assam (Independent) helte chuan an inhnamhnawih thu an tarlang.

Lambunnaa thi Assam Rifle te silai paruk thlalak chu a finfiah nan ULFA(I) te hian email hmangin Thawhṭanni khan an thawnchhuak a ni. Assam Rifle pariat thihna hi SS. Khaplang-a kaihhruai National Socialist Council of Nagaland (NSCN-K) chuan an thiltih nia an chhal thu media te chuan an lo tarlang tawh a ni.

ULFA(I)-in finfiahna an tarlan aṭang hian Assam Rifle te chunga pawikhawihna hi tun hnaia hmarchhak hel ṭangrual pawl an din, United National Liberation Front of West South East Asia (UNLFW) te thiltih a ni tih a chiang a ni.

UNLFW-ah hian Naga hel, NSCN(K) bakah ULFA (I), National Democratic Front of Bodoland (NDFB-S) leh Kamtapur Liberation Organisation (KLO) te an tel a, Manipur-a hel paruk ṭangrual, Coordination Committee (CorCom) pawhin an thlawp a ni.

Naga hel, NSCN-K chuan sorkar laipui nena inkahhai thuthlung an neih chu chhunzawm duh loin March 27 khan inkahhai thuthlung chhunzawm an duh loh thu an puang a, hemi hnu hian NSCN-K hi phelin, NSCN (R) a piang a, hmarchhak hel ṭangrual pawl, UNLFW pawh hi a piang ve nghal a ni.