NE state pali-in IT Act thubuai CBI chhuitir an remti

Hmarchhak state pali - Sikkim, Manipur, Nagaland leh Mizoram chuan Information Technology Act hnuaia thubuaite Central Bureau of Investigation (CBI) chhuitir an remti.

Information Technology Act, 2000 hnuaia thubuai awmte chungchangah CBI chhuitir turin Department of Personnel and Training (DoPT) chuan India rama state sorkar te phalna a ngen a, hmarchhak state pali bakah Andhra Pradesh, Himachal Pradesh, Tamil Nadu leh Jharkhand te chuan remti tawh bawk.

Delhi Special Police Establishment (DSPE) Act, 1946 zulzuiin CBI te hian state sorkar thuneihna huam chhungah state sorkar leh sorkar laipui phalna nei hmasa lo chuan thubuai a chhui thei lo.

IT Act, 2000 hi computer leh internet kaihhnawih thila thubuaite chinfelna leh hremna dân a ni.

DoPT chuan IT Act thubuai CBI chhuitir chungchangah May 18 hian state tina Principal Secretary te meeting a ko a, hemi hun hian phalna la pe lo state te hnenah ngenna siam leh a tum leh a ni. Meeting-ah hian CBI special court hawn belh dan tur chungchang pawh ngaihtuah a ni ang.