B'desh MP hlui Shillong-ah man

Bangladesh MP hlui, Salahuddin Ahmed chu India rama phalna nei loa a luh avangin Meghalaya police te'n Thawhlehni khan Shillong-ah an man.

Ahmed hi Foreigners’ Act tlawhchhana thubuai siamsak a ni.

Meghalaya Additional Director General of Police SK Jain chuan man a nih laiin Ahmed hian rilru lamah buaina a neih thu leh India khua leh a tui finfiah nan lehkha pawimawh a neih loh thu a sawi a, Foreigners’ Act, 1946 tlawhchhana thubuai siamsak a ni, a ti.

Jain chuan Ahmed-a hi National Institute of Mental Health and Neuro Sciences (NIMHANS) ah a hriselna endik a nih thu leh rilru lamah harsatna a neih loh thu a sawi.

Ahmed hi Bangladesh khawpui, Dhaka aṭangin thla hnih ral ta khan a awmna chin hriat lohin a bo tawh a, a nupui Hasina Ahmed chuan a pasal awmna zawngin Bangladesh Prime Minister Sheikh Hasina pawh a pun hial niin an sawi.

Hetihlai hian Ahmed chuan March 10 khan Dhaka, Utarra hmun aṭangin an rubo niin a sawi a, Shillong-a a awm dan leh damdawi-ina dahluh a nih dan a hriat loh thu a sawi.

Shillong-a Bangladesh MP hlui man a nihna hian Meghalaya-Bangladesh ramri, kilometre 443-a thuia ramri venhimna chak loh zia a tarlang a ni, tiin Meghalaya media te chuan an tarlang.