Manipur: Hel pawlin Jiribam-a Zairon Hmar khua an bei

Manipur-a Jiribam district-a tribal chenna, Zairon Hmar khua chu Meitei hel nia hriat ten ralthuam nen an bei a, in paruk an hal bakah a khaw mite pawh an bei bawk niin nimin khan police-ten an sawi.

He inbeihna hi Ningani, November 7 zan lama thleng a ni a, helpawlten heng in paruk te hi an hal ngei a ni tih senior officer chuan a tarlang.

"Report aṭanga lan danin khaw mi eng emaw zat chu sahimna zawngin an khaw bul ramhnuaiah an tlanchhia a ni. In paruk chu hal chhiat vek ania, he thil thleng hi chhui zui mek a ni," a ti.

Kuki-Zo organisation, Indigenous Tribal Leaders Forum(ITLF) chuan helhoin Zairon Hmar khua an beihnaah hian tribal hmeichhe Zosangkim Hmar chu an kah hliam hnuah an hal hlum zui niin an sawi. Hetih lai hian district police lam chuan thi an awm leh awm loh an la sawichiang lo thung.

Manipur tualchhung buaina May 3,2023 aṭanga inṭan tawh niin mi 200 aia tamin nunna an chan tawh a ni. Meitei hnamin Scheduled Tribe (ST) status neih an dodal a, tribal-ten hill district hrang hranga 'Tribal Solidarity March' an huaihawt hnuah buaina hi a chhuak a, tun thlengin intihbuaina hi a chhuak zui reng a ni.

Manipur mipui zingah Meitei hnam hi 53% awmin, Imphal Valley ah an cheng ber. Hetih lai hian tribal ho, Naga leh Kuki te pawh tiamin, 40% an awm a, tlangram lamah an cheng thung.