Meghalaya: NEHU zirlai lungawi loten VC thlalak hal

North Eastern Hill University (NEHU) zirlai lungawi lo, chaw ngheia nawrh huaihawt mekte chuan Vice-Chancellor Professor Prabha Shankar Shukla, Registrar, Deputy Registrar (Academic), Officer on Special Duty (Director) leh university official-te lim leh thlalak an hal. Zirlaite hian university campus chhungah lungawi lohna hi an lantir a ni.

Zirlaite hian thil phut hrang hrang an nei a, chung zingah chuan Registrar leh Deputy Registrar ban, Tura Campus-a Pro Vice- Chancellor dah leh PGSU inthlan a rang lama neih bakah an thil mamawhte ennawnte pawh a tel.

Hun eng emaw chen campus chhunga lungawi lohna an lantir hnuah, an thil phut chungchanga ngaihsak an hlawh loh nia sawiin November 5 aṭang khan tiam chin awm loin chaw ngheiin nawrh hi an huaihawt ṭan a, November 6 aṭang khan university pumpui lockdown an puang tawh bawk.

Vice-Chancellor Shukla chuan zirlaite hnenah hian lehkha thawnin, lungawi lohna an lantir leh campus lockdown an puan chu ti tawp turin a ngen. Zirlaiten Registrar leh Deputy Registrar chungchanga an thil phut chu a hriatthiam thu a sawi bawk. Mahse zirlaite hian a ngenna hi zawm loin amah zawk hi an bei let a ni.