Manipur: Jiribam-a zirtirtu thah vangin Hmar zirlaite lungawi lo

Hmar Students Association (HSA) chuan Manipur-a Jiribam district-a Jairolpokpi khuaa nutling pawisawi lo rawng taka thah a nih leh, in 17 lai hal a ni chu na taka an dem thu an sawi.

Nunna chan ta Zosangkim Hmar hi HermonDew English Junior High School, Jairolpokpi a zirtirtu hna thawk a ni a, a chenna inah silaia kah a nih hnuah hal hlum nia sawi a ni.

HSA chuan thuchhuah siamin, zirtirtu mi inpe tak thah a nih leh khaw ralmuang tak beih a nih chu a runthlak an tih bakah a nunrawnthlak an tih thu an sawi. Zosangkim Hmar hi fa pathum nei a ni a, buaina chhuak chung pawha zirlai tlemte la chambang ten zirna an dawn theih nana mi ṭangkai leh inpe tak a ni, an ti.

Central Reserve Police Force (CRPF), Jairolpokpi-a awmte hma lak danah an lungawi loh thu sawiin, HSA chuan CRPF awmna bulhnaiah he inbeihna hi darkar khat aia rei a thleng niin an sawi.

"Security force-te chuan India khua tui leh tui eng mi pawh, an hnam leh sakhaw thliar loa venghim tura an intiamna chu an kenkawh loh avangin an zak hle tur a ni, " tiin sorkar laipui chu Jairolpokpi-a security force rintlak loh tak chu thlak turin an phut thu an tarlang nghal bawk.