Meghalaya: NEHU zirlaiten nawrh tihtawp duh lo

Meghalaya Governor leh Chief Rector Chandrashekhar H. Vijayashankar chuan North Eastern Hill University (NEHU) zirlai lungawi lo nuar mekte chu nawrh titawp turin Inrinni khan a ngen a, mahse zirlaite hi an nuar chhunzawm zel tho a ni.

Tiam chin neiloa chaw ngheia nawrh neih mek hi NEHU Students Union huaihawt niin nimin khan ni ruk an nawrhna a ni tawh. Zirlaite thil phut zingah hian Vice chancellor Prabha Shankar Shukla ban bakah, Registrar Col Omkar Singh (Retd) leh Deputy Registrar Amit Gupta ban te pawh a tel.

Governor hian NEHU Teacher's Association leh Meghalaya Tribal Teacher's Association te inbiakna a neih puia, zirlaiten an phut chu ngaihtuah a nih tur thu leh lungawi lohna an lantir mek chu ti tawp turin a ngen a ni. VC pawhin university a pangngaia kal zawm leh a nih theih nan zirlaite chu an nawrhna ti tawp tur leh inbiakna neihpui turin vawi tam tak a lo ngen tawh bawk.

NEHUSU president Sandy Sohtun hnenah Registrar leh Deputy Registrar bang tura an phutna chu ngun zawka ngaihtuah turin committee neih a nih tur thu an hrilh. November 14-ah Executive Council-in meeting neiin, heta an thil hmuhchhuah aṭang hian hma an lak tur thu a sawilang bawk. NEHU Tura Campus a Pro-Vice Chancellor dah pawh a remtih thu a sawi nghal bawk a ni.

VC hian NEHUSU te thil phut sawi ho tur hian Zirtawpni khan emergency meeting a ko a, rokhawlhna avangin an nei thei ta lo. Mahse NEHUSU general secretary Toniho S. Kharsati chuan VC in an thil phut chungchanga hma lak a tum danah erawh an lawm loh thu media a hrilh. Lungawi lohna an lantir pawh thuneitute lamin an pawm hma chu an kalpui zel tur thu a sawi.

Chaw ngheia lungawi lohna lantir zinga zirlai ṭhenkhat chu an hriselna dinhmun a tlakhniam avangin damdawi-ina kalpui an ni tawh hlawm. Inrin ni khan zirlai pakhawt chu Shillong Civil Hospital-ah hruai a ni a,a dinhmun a ṭhat loh avangin doctor-ten North East Indira Gandhi Regional Institute of Health and Medical Sciences (NEIGRIHMS) an refer zui a ni.

State education minister Rakkam Sangma chu election campaign avangin a zin chhuak a, Shillong-ah a kir leveh NEHU thuneitute leh zirlai nuar mekte chu meeting neihpui a tum thu a sawi. Official-te pawhin an buaina te chu thlithlai reng a, chinfel thuai theih a beisei thu sawiin, an buaina hian academic session a tih buai a duh loh thu a sawi. Zirlaite hian nawrh an huaihawt hnuah kar liam ta Thawhlehni aṭang khan university-ah lock down an puang a ni.