Assam: Samaguri buaina thlengah CM a ṭawngchhuak

Assam-a Samaguri-a Bharatiya Janata Party (BJP) kawngzawhnaa inkahna thleng leh MLA Jitu Goswami-a'n hliam a tawrh chu Congress party thiltih niin chief minister Himanta Biswa Sarma chuan a puh.

He buaina hi November 9, 2024-a BJP kawngzawh ten Magurmari aṭanga Latani an pan laia thleng a ni.He kawngzawh hi Barhampur constituency MLA Jitu Goswami leh BJP hruaitu Suresh Borah ten an telpui a, tu tih hriat loh aṭanga silai hmehpuah avangin mi eng emaw zatin hliam an tuar a ni. A hmunah hian senior police official-te thleng nghalin, pawikhawihtu an chhui zui nghal a ni.

Chief Minister Sarma chuan a official X ah hemi chungchang hi sawi zuiin, Congress party thiltih nia puhin a dem thu a sawi. Congress party chu thuneihna chelh an duh leh vote an duh avanga tharum hmanga che chhuakah a puh a, mipui ralṭitna hial thlen an duh chu a dem hle a ni tih a sawi a ni. By-election lo awm tura Congress ten hetiang tak maia chet an la ta chu a hriatthiam loh thu sawiin, vote an duhna lamah anmahni an inti hmingchhia a ni, tiin CM chuan a sawi.