Gogoi-a'n tuikhuah chungchang China sawipui turin ngen

Prime Minister Narendra Modi chuan ni thum cham turin Ningani khan China a thleng a, hemi rual hian Assam Chief Minister Tarun Gogoi chuan Brahmaputra lui hnar lama China-in tui khuah a tum chungchang chu China thuneitute sawipui turin Modi a ngen.

China-in a ram chhung, Brahmaputra lui hnara tui a khuap a nih chuan Assam lamin a nghawng an tawrh theih thu Gogoi chuan a sawi a, hei vang hian Prime Minister Modi chu tui khuah chungchang sawichhuak ngei tura a beisei thu a sawi.

Hetihlai hian Arunachal Pra­desh MP Ninong Ering pawhin China thuneitute hnenah ramri chungchang leh stapled visa chungchang sawichhuak turin Modi a ngen bawk.

Prime Minister Modi-a'n China thuneitute a biak hunah Aru­nachal-a India-China ram inchuh chungchang a sawi chhuak lo a nih chuan a van­duai­thlak hle ang tiin, Arunachal East bialtu, Congress MP Ering chuan a sawi.

"China nena ram inchuh thubuaiah India chu a nem zawkah a ṭang thin a, hei hian Arunachal mipuite a tihnual ṭhin a ni," a ti.

Ering chuan, "Arunachal Pradesh chu India ram chhunga mi ngei a ni a, hei vang hian China chuh buai theih a ni lo. Arunachal mite chuan Hindi hmangin India tan nunna hlan an huam a ni," tiin a sawi bawk.

Arunachal MP chuan China-in Arunachal mi an ram tlawh tumte hnena stapled visa a pek ṭhin chungchang pawh sawichhuak turin PM Modi a ngen bawk.