Meghalaya-in NGO hruaitute thubuai hlihsak dawn

Kum 2013-a Meghalaya-a inner line permit (ILP) system kalpui ngiatnaa tlawmngai pawl 13 ṭangrual te'n vantlang bungrua ṭhahnem tak an tihchhiat avanga state sorkarin pawl hruaitu thubuai a siamsak chu a hlihsak dawn.

Vantlang bungrua tihchhiat thubuaiah hian state sorkar din, Special Court chuan April 7 khan Khasi Students' Union (KSU) president Daniel Khyriem manna tur tichhuakin, police te'n an man nghal a, hemi avanga lungawi lo, tlawmngai pawl ṭangrualte chuan Nilaini khan sit-in protest huaihawt nghalin, an thil phutah state sorkarin ngawih a chuh avangin na zawka nawrh huaihawt an rel a, mahse state sorkar chuan tlawmngai pawl hruaitute thubuai chu hlihsak a rel leh ta a ni.

Meghalaya home department chuan Nilaini zana thuchhuah a siamah tlawmngai pawl hruaitu, thubuai tê tham deuh neite chu an thubuai hlihsak a tum thu a tarlang a, tlawmngai pawl ṭangrualte hnenah pawh hriattirna pek nghal a ni. Ṭangrualte hian KSU president Khyriem pawh bail-a a chhuahna tur dilsak an remti bawk. Khyriem hian a hmain bail dil phalna Special Court-in a pek chu a lo hnawl tawh a ni.

Kum 2013-a ILP system kalpui phutna, thla li chhung ngawrh taka kalpui a nih ṭum khan tharum thawhna chhuak leh vantlang bungrua ṭhahnem tak tihchhiat a nih vangin state sorkar chuan tlawmngai pawl ṭangrual hruaitute lakah thubuai 90 chuang a ziaklut.