Meghalaya: NEHU VC chenna in suasam

Meghalaya-a North Eastern Hill University (NEHU) zirlaiten lungawi lohna lantir a, NEHU Vice Chancellor Prof PS Shukla leh official dang pahnihte ban an phut mek laiin, Pathianni khan VC chenna in chu mi tu tih hriat lohten an suasam.

VC Prof Shukla chenna in suasam a nih thu hriat a nih veleh, SP (city ) D Ashwaghosh kaihhruaiin police team leh official dangte pawh a inah hian an kal nghal a ni.

Acting registrar B Rynjah chuan Mawlai police station-ah FIR thehlutin, thubuai ziah luh nghal a ni tih an sawi.

He thil thlen hnu hian zirlaite chuan VC chenna in lam pan hian kawng an zawh zui ve leh a, mahse police-ten an lo dang a ni.

Research Scholars Forum NEHU president Superior Syngkli chuan VC hi November 9 zan aṭang khan a chin hriat lohin a bibo tih a sawi bawk.

NEHU zirlai nawrh huaihawt mek an thlawpna lantirin, zirna in danga zirlai pawl bakah hmeichhe pawl leh NGO hrang hrangte chuan Inrinni khan Shillong Campus-ah kawng an zawh.

Kawng zawh hma hian NEHU-a Science Cluster-ah ṭawngṭaina hun hman phawt niin, zirlaite tiam chin awm loa chaw ngheia nawrh an neih mekna, Administrative Block thlengin kawng hi an zawh.

Zirlaite hian VC bakah registrar leh deputy registrar chu ban an phut a, president Droupadi Murmu hnenah pawh memorandum an thehlut tawh a ni.

Prof. Shukla leh Registrar Colonel (retd) Omkar Singh te kaihhruaina hnuaiha NEHU-a inenkawlna leh kalphung a mumal lo a, zirna lam pawh tlahniamin, infrastructure lamah hmasawnna a awm lo a, institution hmingṭhatna pawh tlahniam tawh hle niin an sawi.

Prof PS Shukla awm hmain NEHU chu India rama university ṭha zual 60 zingah a lang pha a, mahse a enkawl hnuah university dinhmun a tlahniam chak a, tunah chuan 100-150 ranking velah a awm tawh a ni, an ti.