Manipur: Imphal East District-ah buaina chhuah chhunzawm zel

Manipur-a Imphal East-a Yaingangpokpi area-ah Pathianni khan buaina chhuak lehin mi pahnihin hliam an tuar a, pawikhawihtute hi tute nge an nih hriat an la ni lo.

He buaina hi Yaingangpokpi bulhnai, buhhmuna thleng a ni a, misual tu tih hriat lohin Pathianni zing dar 9:30 vel bawrah silai a hmetpuak nia sawi a ni. Hliam tuar pahnihte hi Primary Health Center (PHC) ah enkawl an ni a, buhhmuna an thawhpui dang pathum te erawh an awmna chin hriat a la ni lo thung.

Pathianni zing vek khan hel pawlin Imphal East District-a Thamnapokpi, Yaingangpokpi, Sabung­khok leh Sanasabi te an bei bawk. Zing dar 9:30 vel aṭangin helpawl hian Thamnapokpi bul buhhmuna loneitu hnathawkte chu rocket-propelled grenade (RPG) pathum hmangin an bei a, silaiin an kap zui bawk.

Khawm mite hi himna zawngin an tlanchhe nghal a, helpawl leh security team inzawmkhawm Maha Regiment, Border Security Force (BSF) leh tualchhung police te an inkap zui a ni. Maha Regiment-a police pakhat chuan a banah hliam a tuar.

Buaina hian Pathianni chawhnu lam thleng awhin security force ten theihtawp an chhuah hnuah boruak pawhin ziaawm lam a pan leh thei niin an sawi.