SC-in sorkar laipui leh Assam a zilh

Supreme Court chuan phalna nei loa pemlutte chungchangah sorkar laipui leh Assam chu thla khat chhunga a vawi hnihna atan a zilh.

SC hian Bangladesh mi, phalna nei loa Assam-a lut ṭhinte venna atana India-Bangladesh ramri hung hna kalpui mekah an hmalak tawhna report thehluh turin sorkar laipui leh Assam sorkar chu a lo hriattir tawh a, mahse sorkar laipui leh Assam chuan report hi an la thehlut thei lo.

Justices Ranjan Gogoi leh R F Nariman awmna SC bench phalna nei loa pemlutte thawnkir chungchangah Gauhati High Court chu foreigners tribunal kal dan turah hma la chak loah a puh bawk.

SC bench thuchhuak chuan Assam-a India-Bangladesh ramri hung hna thawh mek enpui turin court commissioner-ah senior advocate Upamanyu Hazarika chu a ruat thu leh report thehlut tura a hriattir thu a tarlang bawk. Court commissioner hian ramri hung hna thawh mek hi a hmunah a enfiah ang a, kar thum chhunga interim report a thehluh hnuah July 30-ah final report a thehlut ang.

Dan phal loha pemlutte thubuai ngaihtuahtu, foreigners tribunal-a chairmen leh member post ruak hnawhkhah chu rang zawka kalpui turin SC chuan Gauhati HC a hriattir bawk.

Hetihlai hian BJP sorkarin Bangladesh-a Hindu, India rama pemte refugee leh, khua leh tui status pek a tum chu All Assam Students’ Union (AASU) chuan dodal a tum thu a tarlang.

AASU chuan Bangladesh mi pemlutte chu eng sakhua pawh ni se dan phal loha pem an ni a, kum 1971, March 25 hnu lama Assam-a Bangladesh mi lutte chu Assam Accord-ah thawnkir tura thuthlung ziah tawh a ni, a ti.

AASU chuan BJP chu politics thila hamṭhatna um nan remchangah sakhuana hmang lo tura a duh thu a tarlang bawk a, Bangladesh Hindu te hnena refugee status pek tumna Assam Accord palzutna tur a ni, a ti.

Bangladesh mi Assam-a pem nasa lutuk do nan Assam-a zirlai pawl leh tlawmngai pawl ṭangrualte chuan kum 1980 chho khan pemlutte thawnkir phutin Assam movement an kalpui a, nasa taka nawrh huaihawt a nih hnuah kum 1985 khan sorkar laipui nen remna thuthlung, Assam Accord an ziak a ni.

BJP kaihhruai sorkar laipui chuan Bangladesh Hindu te hi khua leh tui nihna pek a duh bawk a, Assam ringawt chu Bangladesh Hindu te awmtirna tur an nih loh thu leh Bangladesh Hindu te chu state hrang hrangah chentir an nih tur thu a lo tarlang tawh a ni.