AP Larsap tharin ramri buai chinfel a inhuam

Arunachal Pradesh Governor atana ruat thar, JP Rajkhowa chuan Assam leh Arunachal Pradesh ram inchuh thubuai chinfel leh an ṭhenawm state mipuite nena inlaichinna ṭha siam chu a thil ngaihpawimawh a ni, a ti.

Rajkhowa chuan Governor-a lakluh a nih hunah Arunachal hmasawnna atan ṭha taka a mawhphurhna hlenchhuah zel a tum thu a sawi a, Arunachal ṭhenawm state te nena remna leh muanna hnuaia thawhhona ṭha neih a duh thu a sawi bawk.

Rajkhowa chuan Assam-Arunachal ramri thubuai chungchangah a ṭanpuina an ngen a nih chuan theihtawp chhuaha hma lak a tum thu a sawi.

Arunachal Governor thar chuan hmarchhak state te chu mamawh leh harsatna hrang ṭheuh nei an nih laiin, hmasawnna policy duan kawngah hrut rual vek an nih ṭhin thu a sawi a, tourism leh infrastructure hmasawnna kawngah Arunachal tan a mawhphurhna hlenchhuah ngei a tum thu a sawi. Hetihlai hian Governor-a lakluh a nih hun tur erawh an la tihfel loh thu a sawi bawk.