Manipur: Jiribam district-ah buaina a la sosang

Manipur Jiribam district-ah Thawhṭanni zan khan security force leh helpawl nia sawite inkahna thlengah helpawl lam mi 11 an thi niin Manipur police-te chuan an sawi.

Hetih lai hian Kuki-Zo Council chuan inkahnaa thite hi hel ni loin, Kuki-Zo village volunteer-te an ni tih an sawi thung. He thil thleng vanga lungawi lohna lantirin, nimin zing dar 5 aṭanga zan dar 6 thleng khan Kuki-Zo chenna tlang ramah shutdown an puang zui bawk.

Manipur police-te chuan helpawl nia rinhlelh te hian camouflage uniform inbelin, Jiribam district-a police station leh CRPF camp chu ralthuam nen an bei niin an sawi. Borobekra-a inbeihna hmunah CRPF zinga mi pahnihin hliam an tuar a, pakhat zawk hi a dinhmuna ṭhat loh thu an sawi.An inkah hun chhung hi minute 40- 45 a ni a, helpawlte hnawhdarh tum hian Assam Rifle, CRPF leh police te pawh a hmunah hian an thleng ve nghal tih police ten an tarlang bawk a ni.

Buaina hi Imphal phairam hmun hrang hrangah a darh zel a, ralthuam keng pawl pahnih inkarah inkahna a chhuah zui thu police ten an sawi bawk.

Thawhṭanni chawhnu lam khan Imphal West leh Imphal East district-a khaw hrang hrangah buaina leh inbeihna a thlen thu report an dawng tih official ten an sawi.