NE leh Kolkata inkarah bus service thuai dawn

Sorkar laipui chuan Bangladesh kaltlangin hmarchhak bial leh Kolkata inkarah bus service thuai a tum.

Road Transport and Highways Ministry chuan he thu hi sawiin, kar kalta Ningani khan bus service tur chungchangah meeting an neih thu a sawi a, Union Road Transport Minister chuan thil ṭulte tifel turin Bangladesh Transport Minister biak thuai a tum thu a sawi.

Bus service tur hi Prime Minister Narendra Modi-a'n thla thara Bangladesh a tlawh hunah an chinfel hman beisei a ni.

Road Transport and Highways Ministry meeting-ah hian Tripura aiawhin state Transport Minister Manik Dey pawh a tel. Dey chuan Bangladesh kaltlanga Tripura leh hmarchhak state dangte aṭanga Kolkata thlenga bus service tir turin sorkar laipuia thuneitute hnenah an lo ngen ṭhin tawh thu leh Union Road Transport and Highways Ministry chuan December 13, 2011 khan a lo remtih tawh thu a sawi a, mahse hmalakna erawh a awm zui loh thu a sawi.

Hetihlai hian Tripura chuan kar kalta Zirtawpni aṭang khan Agartala leh Bangladesh khawpui, Dhaka inkarah bus service a chhunzawm a ni.

Agartala-Dhaka inkara bus service hi kum 2003, September khan Tripura sorkar leh Bangladesh sorkar inremna angin ṭan tawh a ni a, mahse kumin January khan Bangladesh-a buaina chhuak vangin tihtawp lailawk a ni.

Bangladesh lam hian kum 1999, July khan Dhaka leh Kolkata inkarah bus an lo service ṭan tir tawh bawk.