N'land Congress MLA 8 te insawifiah

Naga Peoples Front (NPF) kaihhruai, BJP telna sorkar an thawhpui avanga All India Congress Committee (AICC)-in insawifiah tura May 9-a a hriattir hnuah Nagaland Congress MLA pariatte chuan kar kalta Inrinni khan an insawifiahna lehkha an thehlut.

Nagaland Congresss Legislature Party (CLP) hotu Tokheho Yepthomi chuan MLA pariatte chuan insawifiahna lehkha AICC-ah an thehluh vek thu a sawi a, AICC disciplinary committee-in a lo enfiah tur thu leh chu mi hnuah chauh thutlukna siam a nih tur thu a sawi.

Congress MLA te hian NPF kaihhruai Democratic Alliance of Nagaland (DAN-III) sorkar an thlawp chhan chu Naga political issue vang a ni, an ti.

CLP hotu Yepthomi chuan Chief Minister TR Zeliang-a'n Naga political issue chinfel nan eptu awm lohna sorkar din tumin hma a la a, hemi atan hian Joint Legislators Forum a din a ni, a ti a, Congress MLA te'n an thlawp ve loh chuan mipuite'n Naga political issue ngaipawimawh loah Congress MLA te chu an puh dawn a ni, a ti.