Suresh Prabhu-a'n Imphal Railway Station lungphum phum

Union Railways Minister Suresh Prabhu chuan Imphal Railway Station lungphum chu Inrinni khan Manipur-a Malom-ah a phum a, state Chief Minister O Ibobi Singh chuan a ṭawiawm.

Imphal station hi Yurembam thingtlang khaw huam chhunga awm niin, Imphal aṭanga km 13 vela hla a ni a, a bul lawkah hian airport a awm bawk. Station-ah hian passenger platform pathum a awm dawn a, Manipur-a an hmun pawimawh pahnih Kangla Fort leh Shree Govindajee Temple pian zia ang thei tura duan a ni dawn a ni. India rama Railway tunnel thui ber tur lei verh a ni dawn a, a thui zawng hi km 11.55 ni turah ngaih a ni a, Jiribam-Tupul-Imphal te a thlunzawm dawn a, tunnel 37 zet a awm ang. Tuna India rama Railway tunnel thui ber chu Pir Panjal Railway tunnel a ni a, km 11.25-a thui niin Jammu and Kashmir-a awm a ni. He project kalpui nan hian cheng vaibelchhe 5,996 ruahman a ni a, kum 2018-a zawh hman tura beisei a ni. Rel kawng siam turah hian hmun eng emaw zatah lei dawh a ni ang.

Prabhu chuan Railway Ministry chuan hmarchhak huam chhunga a tam thei ang ber rel kawng siam turin hma lak mek a ni, a ti. Culture vawn nun a pawimawh tih sawiin, state hnam rohlu Kangla Fort Gate leh Shri Govindji Temple te pian zia anga station sak tura ruahman chu thil ṭha tak a nih thu a sawi. Minister of State for Railways Rajen Gohain chuan hna hi a vil dawn a, a hun takah zawh a ni theih ngei a duh tih a sawi bawk. Manipur Chief Minister Okram Ibobi Singh chuan railway ministry te hmalakna chu lawmawm a tih thu sawiin, a bik takin hmarchhakte tana inkalpawhna kawnga hma an lakna te chu ropui a tih thu a sawi.