Arunachal Pradesh CM leh a team ten tui lenna hmun fang

Arunachal Pradesh Chief Minister Pema Khandu leh Union Minister of State for Home Affairs Kiren Rijiju bakah Deputy Chief Minister Chowna Mein te chuan an state-a tuilian tuar nasa Lohit, Namsai leh Changlang district-te chu helicopter hmangin an fang kual.

Chief Minister leh a team te chuan Wakro, Namsai, Mahadevpur, Lekang, Jairampur, Miao leh Chowkham te chu tuilian avanga harsatna tuar nasa zual te an nih thu an sawi. Tuilian tuartu hi mi nuai thum chuang zet an nih tawh thu sawiin, sorkar chuan chhawmdawlhna ngawrh taka a thawh reng thu leh, nasa zawka hmalak a nih tur thu an sawi bawk.

Pema Khandu chuan vanduaina tawkte chhawm-dawlna tur hian National Disaster Res-ponse Fund (NDRF) leh State Disaster Response Fund (SDRF) te ruahman sak an nih tur thu sawiin, Disaster Management-te hmalakna chu ngaichang turin mipuite a ngen. Khandu chuan an harsatna tawh mek enfiah tur hian sorkar laipui-a inter-ministerial team te chuan an state an rawn pan thuai dawn a, central team chu ṭha taka lo dawng sawng turin mipuite a chah a, an report siam chu Union Home Ministry-ah thlen a nih tur thu a sawi.

MoS Rijiju pawhin tuilian avanga harsatna tawkte ṭanpuina turin flood relief fund aṭanga sum hmuh te chu sem chhuah thuai a nih tur thu a sawi. Hetih lai hian All Arunachal Pradesh Students’ Union (AAPSU) chuan Union Minister of State for Home Affairs Kiren Rijiju chu central relief package pe chhuak tlai leh mipuite harsatna herethiam duh lohah an puh. AAPSU leh zirlai pawl dang All Namsai District Students’ Union, All Tai Khampti Singpho Students’ Union bakah Changlang, Lohit, Longding, Anjaw, Namsai, Dibang & Tirap Team te chuan tuilian tuartute chhanchhuah hna an thawk a ni. Tuilian tuarte chhawmdawl hna thawk tur hian NGO, political party leh pawl hrang hrangte chuan ke an pen chhuak mek a, chhun zan zawmin hna an thawk a ni. Namsai Deputy Commissioner RK Sharma chuan relief camp-a khawsa mek ten ei leh barah harsatna an tawh loh nan ei leh in tur theih ang anga lakkhawm sak an ni, a ti.

CM Khandu chuan tuilian avanga mahni in leh lo chhuahsan te leh kawng hrang hranga harsatna tawkte chu a tawrhpui thu sawiin, sorkar chuan theihtawp chhuahin chhawmdawl hna a thawk zel dawn a ni a ti a, state sorkar leh sorkar laipui aṭanga chhawmdawlna awm thei ang te ngaihtuah sak an nih thu a sawi bawk. Chief minister team hi Tezu MLA Dr Mohesh Chai, Under Secretary CM Sharma, Commissioner (Health) Hage Kojeen leh Chief Engineer Modak Ngomdir ten an ṭawiawm bawk a ni.