LPG Scheme-ah Adhaar mamawh dawn lo: Pradhan

India rama state hrang hrangah Aadhaar card pawimawhna san chhoh zel laiin Assam leh Meghalaya state-te chuan Pradhan Mantri Ujjwala Yojana (PMUY) kalpui mekah Aadhaar card kher hman a ngaih loh tur thu Union minister Dharmendra Pradhan chuan Inrinni khan a sawi.

Petroleum and Natural Gas Minister chuan, "Assam leh Meghalaya-a cheng nghet te tan PMUY hnuaiah Aadhaar card hmanga inziah luh kher a ngai lo a ni" a ti. Tunhnai khan hmarchhak state te chuan Kolkata-ah District Nodal Officers meeting an nei a, meeting-ah he thu hi minister hian sawi chhuakin, LPG connection-ah erawh 82% zet chu Aadhaar card nen thlunzawm a nih thu a sawi. He meeting hi IOC Chairman B Ashok leh Joint Secretary (marketing) Oil ministry Ashutosh Jindal te chuan an hmanpui a ni.

PMUY hi India rama Below Poverty Line (BPL) chhungkua-a hmeichhia te tana a thlawna LPG connection tihna tura duan a ni a, he project hi kumin May 1 aṭang khan kalpui ṭan niin, mi nuai 23 zet te chuan connection an ti tawh a ni. He project hi August 15 aṭang khian West Bengal-ah kalpui ṭan ve leh tura ruahman a ni a, sorkar laipui chuan he project atan hian 2016-17 atan cheng vaibelchhe 8000 a ruahman a, kum thum chhungin BPL chhungkua-a hmeichhia vaibelchhe nga te hnenah LPG connection pek hman tum a ni.

Petroleum and Natural Gas Minister Pradhan chuan PMUYchu dik taka kalpui a nih chuan sorkar chuan cheng vaibelchhe 21,000 vel pawisa luangral tur a veng thei dawn niin a sawi.