Assam-in pemlutte thawnkirna thuthlung ziak turin ngen

Assam-a political party leh non-political group te chuan Assam-a dan phal loha pemlutte thawnkir nan Prime Minister Narendra Modi chu Bangladesh leh Nepal thuthlung ziahpui turin an ngen.

Assam-a pawl hrang hrangte chuan Pathiannia convention an neih hnuah he thutlukna hi an siam a, National Register of Citizens (NRC) 1951 update-na kalpui mek chu thlawp zel an tum thu an tarlang bawk.

"Assam-a phalna nei loa Bangladesh leh Nepal mi chengte an rama thawnkirna atan 'repatriation treaty' ziah a ngai a, phalna nei loa chengte hi NRC update-na hmanga finfiah theih a ni. Pemlutte vanga Assam harsatna chinfel nan Prime Minister Modi chu kan ṭhenawm ramte thuthlung ziahpui turin kan ngen a ni," tiin pawl hrang hrangte resolution chuan a tarlang.

Assam-a pemlutte chu kum 1936 aṭang khan political issue lian tak a nih thu tarlangin, NRC update chu sakhaw ṭan bik emaw duhsak bik nei loa dik taka kalpui a nih chuan Assam harsatna chu chinfel theih an beisei thu an tarlang bawk.

Educationist Udayaditya Bharali chuan NRC update chu kum 10 chuang Assam mipuite'n an lo phut tawh a ni, a ti.

Convention-a tel mipuite chuan Bangladesh aṭanga pem­lutte tam lutuk avangin Assam leilung fate chuan 'identity crisis' an neih thu an tarlang bawk.

Land Boundary Agreement (LBA) kalpuina tur chingfel turin thla leh hian Prime Minister Modi-a'n Bangladesh a tlawh dawn a, hemi denchhen hian ṭangrual pawlte chuan Bang­la­desh mite thawnkirna tur thu­thlung hi siam turin Modi an ngen a ni.

Krishak Mukti Sangram Samiti president Akhil Gogoi chuan kum 1971, March 24 hnu lama Assam-a pemte chu eng sakhaw mi leh sa pawh ni se an rama thawnkir tur an ni, a ti.

"BJP sorkarin Bangladesh Hindu te a hum duh a nih chuan nga ti nge Gujarat emaw Maha­rastra leh Delhi-ahte an awmtir loh?" tiin Akhil chuan a sawi bawk.

Convention chuan March 24, 1971 hnu lama rampawn aṭanga Assam-a pemte chu boycott vek turin mipuite ngen a tum a ni.