AP sorkarin social media hman sual a hlauthawng

Arunachal Pradesh sorkar chuan ṭhalaite'n a ṭha lo zawnga social media an hman a hlauhthawn thu tarlangin, chi leh chi inkara buaina tichhuak thei thil emaw sorkar mi pawimawhte beihna remchanga hmangte chungah action lak a nih tur thu a tarlang.

State sorkar thu­puang­tu Bamang Felix chuan, "Fake account hmangin pawl leh mi ṭhenkhatin sorkar mi pawimawhte beihna remchangah hmangin thudik tawk lo an thehdarh ṭhin a, heng mite hian vantlang mipuite hmaah sorkar an tihmingchhia a ni," a ti.

A titu pawl leh mimal hming sawi lang loin Felix chuan hnam hrang hrangte inkara inhuatna thlen thei thu thehdarh ching an awm thu a sawi bawk.

State sorkar chuan ṭha­laite social media hman dan chu uluk zawka enpui turin police leh IT de­part­ment te a hriattir bawk a, pawi­khawihtu chu IT Act leh IPC sec­tion hman theihte hmanga hrem zel turin a hriat­­tir bawk.

Arunachal sorkar chuan pawl ṭhenkhat fake account hmanga social media-a remna leh muanna tichhe thei, thudik lo thehdarh ṭhinte chu an account block sak turin rawtna a siam bakah khawtlangah buaina a chhuak a nih chuan heng pawlte hi mawhphurtu an nih tur thu a tarlang.

Felix chuan tunhnaiah ama chanchin dik lo takin mi pakhatin a thehdarh thu leh a titu lakah hian Itanagar Police Station-ah FIR a thehluh thu a sawi bawk.

"Social media chu hmun hrang hranga awmte inthlunzawmna tur leh inkawmhona tur a ni a, inhuatna thlen thei thu thehdarh nan emaw midang tihmualphona atana hman tur a ni lo," tiin Felix chuan mipuite chu a ṭangkai zawnga social media hmang tura a duh thu a sawi.