AAYF-in nawrh huaihawt a tum

Garo Hills Autonomous District Council (GHADC) inthlan neih a nih theihna atana executive committee ṭhiat tura an ngenna chu state sorkarin a tih­puitlin theih loh avangin All A’chik Youth Federation (AAYF) chuan lian tham zawka nawrh huaihawt a tum.

AAYF chuan an thil phut tihpuitlin nan state sorkar chu May 15 thleng hun a lo pe tawh a, state sorkarin a chhan let loh avangin nawrh huaihawt an tum a ni.

A thawh khatna atan nawrh hi nimin khan poster campaign neiin ṭan nghal a ni a, vawiin leh naktuk hian non-cooperation movement hmanga chhunzawm leh a ni ang. AAYF chuan May 21 thleng zan lamah kawngpui dang chat bawk a, total bandh huaihawt an tum bawk.

Hetihlai hian West Garo Hills district Deputy Commissioner (DC) Pravin Bakshi chuan AAYF te nawrh huaihawt tum khap nan Meghalaya Maintenance of Public Order (Amendment) Act, 2013 lekkawh a nih tur thu a sawi.

Remna leh muanna boruak tichhe zawnga chete laka action la turin security force tam zawk dahluh an ni a, state sorkar leh sorkar laipui hnuaia office te chu bandh huaihawt chhunga hawng vek tur leh a pangangai anga hna thawk vek turin hriattir an ni tih Bakshi chuan a sawi.

District thuneitute chuan nawrh huaihawt chhunga vanthlang bungrua tichhiat a nih chuan court-ah thubuai siam a nih tur thu an tarlang.

GHADC seat tihpunna atana Par­liament-a Sixth Schedule amendment bill pass hun a nghah avangin Megha­laya sorkar chuan GHADC-ah inthlan huaihawt loin a term vawi thum chuang a pawtsei tawh a ni. Sixth Schedule amend­ment bill hi Law Ministry-ah a la tangkhang nia sawi a ni a, hei vang hian AAYF chuan state sorkar chu a rang lama GHADC inthlan huaihawt turin a phut a ni.