NE hmeichhiate tan scholarship scheme tlangzarh
Aryans College of Engineering Chandigarh chuan, Beti Bachao, Beti Padhao (Save girl child, educate girl child) scheme hnuaiah hmarchhak hmeichhiate tan special scholarship scheme a siam a, scheme hi Aryans Group chuan tun hnai khan Nagaland, Dimapur-ah a tlangzarh.
He scheme kalpuina atan hian toll free helpline 1800-30000-388 siam a ni bawk.
Scheme kaltlanga scholarship dil duhte chu toll free number-ah hian May 31 thleng missed call pe-in a in register theih bakah website, www.aryans.edu.in. ah a in register theih bawk.
Aryans Group Chairman Dr. Anshu Kataria chuan scheme dawng tur hian hmarchhak state hmeichhia 50 thlanchhuah an nih tur thu sawiin, an zirna senso 50% chu college-in a tumsak tur thu leh 50% chu Education Loan anga pek an nih tur thu a sawi.
Scholarship dawng turte chu 'merit cum means basis'-a thlanchhuah an nih tur thu sawiin, engineering leh technology lamah chhungkaw harsaa hmeichhiate chuan he scheme kaltlang hian an thiamna leh theihna an haichhuak thei dawn a ni, a ti.
Aryans Group Director Prof. A.P Jain pawhin thu sawiin, Aryans Group scholarship scheme hnuaiah India rama zirlai 2500 chuangin zirna sang zawk an chhunzawm theih phah thu a sawi.
Aryans Group hian India rama zirlaite tan scholarship scheme hrang hrang a siam a, chung zinga a langsar zualte chu- Dr. Kiran Bedi scholarship, Army personnel scholarship, Beti Bachao, Beti Padhao scholarship leh tribal area students scholarship te an ni.